وجهت الفنانة هناء الادريسي رسالة مطولة للنساء، من أجل التعبير عن قوتهن أمام الرجل، والتعامل معه بذكاء للحفاظ على مكانتها وشخصيتها أمامه، دون التصرف بطريقة غير لائقة.
ونشرت الادريسي تدوينة مطولة عن هذا الموضوع، قالت من خلالها: “كيفاش تكوني زوجة قوية: اذا بغينا نغيرو نفوسنا خاصنا نعرفوا نقط الضعف ديالنا .. المرأة القوية ماشي هي لي كتهضر بصوت عالي و تقول كلام جارح و لا مستفزة.. بالعكس المرأة القوية هي مرأة مربية و مؤدبة و لكن واضحة يعني كتعرف توصل رأيها و احاسيسها و مشاعر ديالها لراجلها بلا متخاف و لا تحشم و بكل وضوح … لو بغات تقول حاجة مقلقاها ماشي غادي تقلبها فلم هندي بكى و غوات.. البنت القوية ممكن تنزل دمعة و هي كتهضر و كديرها و هي كدلع بلا متفقد اعصابها”.
وأضافت الفنانة الشابة في نفس التدوينة: “الزوجة القوية كتناقش راجلها بالطريقة لي كيفهمها و هي طريقة الرجال .. كوني غير واضحة و عرفي كيفاش تعبري على لي مقلقك بلا متفقدي اعصابك و لا تبكي، و من أهم الصفات لي كتميز المرأة القوية و لي كتنساوها بزاف و هي انها مكتخليش زوجها يكون هو مركز الكون ليها او الحاجة الوحيدة لي كدور عليه حياتها .. و كتكون امرأة غامضة في تصرفاتها ماشي بحال شي كتاب مفتوح أي واحد يقراه بسهولة و ميمكنش واحد يتوقع بسهولة هي كيفاش كتفكر و لا شنو غادي دير و مكتعطيش للراجل فرصة يشوفها في أسوأ حالاتها زعما باكية و مبهدلة و كتغوت كتخلي رأسها حتى كتهدا و كتهضر و تفتح نقاش باش متقولش شي حاجة و تندم عليها من بعد .. و فيها ضحك و عزيز عليها تقشاب و اكيد بلا متقلل أدب على رجلها و يكون ضحكها خفيف ضريف على القلب وكتعطي قيمة رأسها”.
وأكملت قائلة: “ملي كيقول ليها راجلها شي حاجة زوينة و كيمدحها كتبتسم ابتسامة زوينة و تقول ليه شكرا كبيدا ماشي ديري فيها حدث الاسبوع و زعما ممتيقاش و تبقى تقول ليه حلف تاعجبتك ههه.. الزوجة القوية لا عندها هاد المدح حاجة عادية حيت هي اصلا ماكينش منها ( الثقة ثم الثقة ثم الثقة ) و كتخلي عندها هواية كتمارسها باش تشغل بيها رأسها و متخليش راجلها يكون مركز الكون.. رياضة أو أي حاجة نتوما كتبغيوها و كتعامل مع جسمها بحال شي قطعة فنية نادرة كتبغي جسمها شكلها فورما ديالها و كتفشش راسها و دير رياضة باش تحافظ على صحتها و رشاقة ديالها و كتلبس مزيان وكتهلا في بشرة ديالها و تحافظ على نظرتها و نعومة ديالها كتكون مثقفة كتقرا كتب و كتطلع على مواقع مفيدة”.
وختمت صاحبة أغنية “حرلمي” كلامها وكتبت: “هاد الزوجة قوية ماشي امراة خارقة هي كاينة في داخل كل امرأة فينا، كنتمنى نكون فدتكم و تيقوا في راسكم را كلكم زوينات و فنات خاص غير نتيقو فنفوسنا و نبغيو راسنا و نعطيوه قيمة .. لان اللي كتبغي راسها غتقدر تمنح الحب لراجلها لوليداتها للاقارب و للناس عامة .. و الي مكتبغيش راسها عمرها ماغتقدر تبغي حتى حاجة فالحياة”.