خرجت الفنانة السورية أصالة نصري بأول تعليق لها حول قضية اعتقالها في مطار بيروت بتهمة حيازة كمية من الكوكايين في علبة الماكياج الخاصة بها.
وقالت أصالة واصفة ما مرّت به: “على قدّ ماكانت الساعات الطويلة الماضية قاسية وصعبة، على قدّ مافرحت بالمحبّه وبالإهتمام وبالثقة اللي غمرتوني فيها، ماتعوّدت بحياتي فسّر أو وضّح أو كون بمطرح المتّهم، مو بس لثقتي بنفسي بل لأنّي ومن عمري ست سنين وأصغر وأنا بين الناس وكتار كتير اللي اهتمّوا فيني، وكتار كتير اللي أضافولي وعلّموني، ولا أبالغ لو قلت إنّي بحسّ بمسؤولية التعبير حتّى فيما له بالغ الأثر على أماني وأمان عائلتي، لأنّي ضمير هالناس اللي مابيقدر صوتهم يوصل، طبعاً مرّات بندم وبقول (شو كان بدّي بهالتعب) بس الأكيد إنّي خلقت لكون متل ما أنا”.
وأضافت متحدّثة عن العاصمة اللبنانية حيث اعتقلت: “بيروت حبيبتي وتوأمي والناس اللي فيها بتساعدني وبتحبني أكتر بكتير من غيرهم، أنا بحسّ حالي خلقت فيها وبعشق كلّ ذرّه من ترابها، ومارح أزعل منها كتير لأنّه مالها ذنب”.
ووجّهت أصالة رسالة شكر وامتنان لكل من ساندها: “شكراً لكلّ اللي ساندوني وساعدوني من كبار هالدوله اللي بيتعذبوا أكتر منّي ليضلّوا كبار، وصلت اليوم بيتي تعبانه شوي ومصدومه شوي ومقهوره شوي، بس كمان عندي أمل بالضمير وخصوصاً لمّا قريت بعض الرسائل لمن لاتربطني بهم مودّه ومع ذلك نفوا عنّي ما أُشيع، والحقيقه هالشي فرّحني متل مافرحت بالكم الهائل من المحبّه والإهتمام اللي خفّف عنّي شعور الظلم اللي مارح أتعوّد عليه، مافي شي إسمه صحافة صفرا بس فيه ناس صفرا بيشتغلوا صحافة، وكلامهم أنتوا ردّيتوا عليه، ومالحق يجرحني، وسؤالي إلهم ليش لازم كون مُتّهمه وملوّثه ليكتب قلمكم عنّي؟ ممنوع كون حرّه؟ ممنوع طالب بالعدل؟ ممنوع كون بشر متل البشر اللي خلقهم الله ليكونوا جنب بعض؟ أملي ببكره أحلى كبير وأملي حتّى بالضمير اللي مات يصحى كمان مازال موجود، وأنا كتبت لطمّنكم .إنّي قدوه ووفيّه لثقتكم ومعكم عم بستنّى العدل يسود، ومعكم عم كافح لنكون أحرار، ورح أرجع بيروت لما بتشتقلي، وتحميني قبل ماتظلمني
ويأتي ذلك بعد تداول العديد من الأنباء حول اعتقالها في مطار بيروت بعد اكتشاف شرطة المطار كمية من مخدر الكوكايين في علبة الماكياج التي كانت تحملها معها.